ಫಿಂಚ್ಲಿ, ಲಂಡನ್: ಜಗತ್ಪ್ರಸಿದ್ಧ ಸೂಫಿ ಸಂತ ಶೇಖ್ ಅಬ್ದುಲ್ ಖಾದಿರ್ ಜಿಲಾನಿ (ಖ.ಸಿ) ಅವರ ಜಾಗತಿಕ ಆಧ್ಯಾತ್ಮಿಕ ಕೊಡುಗೆಗಳು ಇಂದಿಗೂ ಅಮರ ಎಂಬುದನ್ನು ಸಾರುವ ನಿಟ್ಟಿನಲ್ಲಿ, ಕೆಸಿಎಫ್ ಯುನೈಟೆಡ್ ಕಿಂಗ್‌ಡಮ್ (KCF UK) ವತಿಯಿಂದ ಲಂಡನ್‌ನ ಫಿಂಚ್ಲಿಯಲ್ಲಿ ಅಕ್ಟೋಬರ್ 3, 2026 ಶನಿವಾರದಂದು ಭವ್ಯ ಮತ್ತು ಅತ್ಯಂತ ಶಿಸ್ತುಬದ್ಧ ಮುಹಿಯುದ್ದೀನ್ ರಾತೀಬ್ ಮಜ್ಲಿಸ್ ಕಾರ್ಯಕ್ರಮವನ್ನು ಹಮ್ಮಿಕೊಳ್ಳಲಾಗಿತ್ತು.
ಶೇಖ್ ಜಿಲಾನಿ ಅವರ ಅನುಸ್ಮರಣೆಯನ್ನು ಜಗತ್ತಿನಾದ್ಯಂತ ವಿವಿಧ ಹೆಸರುಗಳಿಂದ ಕೊಂಡಾಡಲಾಗುತ್ತದೆ. ಈಜಿಪ್ಟ್‌ನಲ್ಲಿ ಮೌಲಿದ್ ಅಲ್-ಜಿಲಾನಿ, ಆಫ್ರಿಕಾದಲ್ಲಿ ಹೋಲಿಯಾ, ಉತ್ತರ ಭಾರತದಲ್ಲಿ ಗ್ಯಾರವಿ ಶರೀಫ್ ಹಾಗೂ ದಕ್ಷಿಣ ಭಾರತದ ಕೇರಳ ಮತ್ತು ಕರ್ನಾಟಕದ ಕರಾವಳಿ ಭಾಗದಲ್ಲಿ ಮುಹಿಯುದ್ದೀನ್ ರಾತೀಬ್ ಅಥವಾ ಮುಹಿಯುದ್ದೀನ್ ನೇರ್ಚೆ ಎಂಬಿತ್ಯಾದಿ ಹೆಸರುಗಳಲ್ಲಿ ಆಚರಿಸಲಾಗುವ ಈ ಪವಿತ್ರ ಸಂಪ್ರದಾಯವನ್ನು, ಬ್ರಿಟನ್‌ನಲ್ಲಿ ನೆಲೆಸಿರುವ ಕರಾವಳಿ ಭಾಗದ ಅನಿವಾಸಿ ಉಮ್ಮತ್ತುಗಳು ಲಂಡನ್‌ನ ಹೃದಯಭಾಗದಲ್ಲಿ ಅತ್ಯಂತ ಯಶಸ್ವಿಯಾಗಿ ಮರುಸೃಷ್ಟಿಸಿದರು.
ಆಧ್ಯಾತ್ಮಿಕ ಭಕ್ತಿ ಹಾಗೂ ಶಿಸ್ತಿನ ಸಂಗಮ
ಯುನೈಟೆಡ್ ಕಿಂಗ್‌ಡಮ್‌ನ ವಿವಿಧ ಭಾಗಗಳಿಂದ ಆಗಮಿಸಿದ್ದ ನೂರಾರು ಸುನ್ನಿಗಳು ಈ ಆಧ್ಯಾತ್ಮಿಕ ಸಭೆಯಲ್ಲಿ ಜಮಾಯಿಸಿದ್ದರು. ಶೇಖ್ ನಿರ್ದೇಶಿಸಿದ ಅಲ್ಲಾಹನನ್ನು ಸ್ಮರಿಸುವ ಪವಿತ್ರ ಝಿಕ್ರ್ ಗಳನ್ನು ಭಕ್ತಿಪೂರ್ವಕವಾಗಿ ಪಠಿಸಲಾಯಿತು. ಇದರೊಂದಿಗೆ ಕರಾವಳಿಯ ಸಾಂಸ್ಕೃತಿಕ ಪರಂಪರೆಯಾಗಿರುವ ಪ್ರಸಿದ್ಧ ಮುಹಿಯುದ್ದೀನ್ ಮಾಲೆ ಯ ಆಯ್ದ ಭಾಗಗಳನ್ನು ಅತ್ಯಂತ ಸುಮಧುರವಾಗಿ ಆಲಾಪಿಸಲಾಯಿತು. ಸಭೆಯಲ್ಲಿದ್ದ ನೂರಾರು ಜನರು ಸದುದ್ದೇಶದ ನಿಯತ್ತಿನೊಂದಿಗೆ, ಅತ್ಯಂತ ಶಿಸ್ತು ಮತ್ತು ಭಕ್ತಿಯಿಂದ ಕುಳಿತು ಕಾರ್ಯಕ್ರಮವನ್ನು ಯಶಸ್ವಿಗೊಳಿಸಿದರು.
ಲಂಡನ್‌ನಲ್ಲಿ ಕರಾವಳಿ ಶೈಲಿಯ ಆತಿಥ್ಯ ಮತ್ತು ‘ಪಳ್ಳಿ ಕರಿ’ಯ ಸವಿಯುಣ್ಣು
ತಾಯ್ನಾಡಿನ ನೆನಪುಗಳನ್ನು ಮರುಕಳಿಸುವಂತೆ, ಈ ಕಾರ್ಯಕ್ರಮದಲ್ಲಿ ಕರಾವಳಿಯ ಸಾಂಪ್ರದಾಯಿಕ ಶೈಲಿಯ ವಿಶಿಷ್ಟ ಆತಿಥ್ಯವನ್ನು ಏರ್ಪಡಿಸಲಾಗಿತ್ತು. ಲಂಡನ್‌ನಲ್ಲಿದ್ದರೂ ನಮ್ಮ ಊರಿನ ಸಂಪ್ರದಾಯದಂತೆ ವಿವಿಧ ಮನೆಗಳಿಂದ ಅತ್ಯಂತ ಪ್ರೀತಿಯಿಂದ ತಯಾರಿಸಿ ತಂದಿದ್ದ ಪತ್ತಿರ್ (ರೊಟ್ಟಿ) ಸ್ವೀಕರಿಸಿ, ಅದರೊಂದಿಗೆ ಕೆಸಿಎಫ್ ಯುಕೆ ಸದಸ್ಯರೇ ವಿಶೇಷವಾಗಿ ಸಿದ್ಧಪಡಿಸಲಾಗಿದ್ದ ಸಾಂಪ್ರದಾಯಿಕ ‘ಪಳ್ಳಿ ಕರಿ’ (ಮಸೀದಿ ಶೈಲಿಯ ಮಾಂಸದ ಸುಕ್ಕ) ಯನ್ನು ನೆರೆದಿದ್ದ ಎಲ್ಲರಿಗೂ ಉಣಬಡಿಸಲಾಯಿತು. ಅಲ್ಲದೆ, ಪ್ರತಿಯೊಬ್ಬರ ಮನೆ ಮನೆಗೂ ಈ ತಬರ್ರುಕ್ ಅನ್ನವನ್ನು ತಲುಪಿಸಿ ಸೌಹಾರ್ದತೆ ಮೆರೆಯಲಾಯಿತು.
‘ಅಲ್ ರಿಹ್ಲಾ’ ಮೊಬೈಲ್ ಅಪ್ಲಿಕೇಶನ್‌ ಯುಕೆಯಲ್ಲೂ ಅಧಿಕೃತ ಚಾಲನೆ
ಇತ್ತೀಚೆಗೆ ಸುಲ್ತಾನುಲ್ ಉಲಮಾ ಎ.ಪಿ. ಅಬೂಬಕ್ಕರ್ ಮುಸ್ಲಿಯಾರ್ ಅವರ ದಿವ್ಯಹಸ್ತದಿಂದ ಬಿಡುಗಡೆಗೊಂಡ KCF ಇಂಟರ್‌ನ್ಯಾಷನಲ್ ಕೌನ್ಸಿಲ್‌ನ ‘Al- Rihla’ ಮೊಬೈಲ್ ಅಪ್ಲಿಕೇಶನ್‌ ಯುನೈಟೆಡ್ ಕಿಂಗ್‌ಡಮ್‌ನಲ್ಲಿನ ಅಧಿಕೃತ ಚಾಲನೆಯೂ ಇದೇ ವೇದಿಕೆಯಲ್ಲಿ ನಡೆಯಿತು. KCF ಯುಕೆ ವತಿಯಿಂದ ಆಯೋಜಿಸಲಾದ ಈ ಕಾರ್ಯಕ್ರಮದ ಅಂಗವಾಗಿ ಅಪ್ಲಿಕೇಶನ್‌ನ ಪರಿಚಯ ಮತ್ತು ಅದರ ಉದ್ದೇಶಗಳ ಕುರಿತು ಮಾಹಿತಿ ನೀಡಲಾಯಿತು.
ನೇತೃತ್ವ ವಹಿಸಿದ್ದ ಪ್ರಮುಖ ಉಲಮಾಗಳು ಮತ್ತು ಗಣ್ಯರು
ಈ ಭವ್ಯ ಕಾರ್ಯಕ್ರಮದ ಅಧ್ಯಕ್ಷತೆಯನ್ನು KCF ಯುನೈಟೆಡ್ ಕಿಂಗ್‌ಡಮ್ ಇದರ ಅಧ್ಯಕ್ಷರಾದ ಅಬ್ದುಲ್ಲಾ ಬೈಕಂಪಾಡಿ ಅವರು ವಹಿಸಿದ್ದರು.
- ಕಾರ್ಯಕ್ರಮದ ಆಧ್ಯಾತ್ಮಿಕ ನೇತೃತ್ವವನ್ನು KCF UK ಸಂಘಟನಾ ಕಾರ್ಯದರ್ಶಿ ನೌಶಾದ್ ಮುಈನಿ ಉಸ್ತಾದ್ ಅವರು ಅತ್ಯಂತ ಅಚ್ಚುಕಟ್ಟಾಗಿ ನಡೆಸಿಕೊಟ್ಟರು.
- ಅಲ್ ಇಹ್ಸಾನ್ ಯುಕೆ (Al Ihsan UK) ಇದರ ನೇತಾರರಾದ ಮುನೀಬ್ ನೂರಾನಿ ಅವರು ಸಭೆಯನ್ನುದ್ದೇಶಿಸಿ ಶೇಖ್ ಜಿಲಾನಿ ಅವರ ಶಾಂತಿ ಮತ್ತು ಸೌಹಾರ್ದತೆಯ ಸಂದೇಶದ ಭಾಷಣ ಮಾಡಿದರು.
ವೇದಿಕೆಯಲ್ಲಿ ಪ್ರಮುಖ ಉಲಮಾಗಳು ಹಾಗೂ ಧಾರ್ಮಿಕ ಮುಖಂಡರಾದ ಶಹೀದ್ ಮುಈನಿ, ಸಾಲಿಮ್ ಮುಈನಿ, ಇಸ್ಮಾಯಿಲ್ ನೂರಾನಿ, ಅದಾನಿ ಉಸ್ತಾದ್, ಫೈಜಿ ಉಸ್ತಾದ್ ಮತ್ತು ಸುಹೈಬ್ ಸುಲ್ತಾನಿ ಉಪಸ್ಥಿತರಿದ್ದು ಕಾರ್ಯಕ್ರಮಕ್ಕೆ ಕಳೆ ತಂದರು.
ದೂರದ ಊರುಗಳಿಂದ ಆಗಮಿಸಿ, ಸ್ವಯಂಸೇವಕರಾಗಿ ದುಡಿದು ಈ ಧಾರ್ಮಿಕ ಮಹಾಸಭೆಯನ್ನು ಐತಿಹಾಸಿಕ ಮೈಲಿಗಲ್ಲಾಗಿಸಿದ ಪ್ರತಿಯೊಬ್ಬರಿಗೂ ಕೆಸಿಎಫ್ ಯುಕೆ ಸಮಿತಿಯು ಕೃತಜ್ಞತೆ ಸಲ್ಲಿಸಿದೆ. ನೆರೆದಿದ್ದ ಭಕ್ತರ ಪ್ರಾರ್ಥನೆ ಮತ್ತು ನಿಯತ್ತುಗಳನ್ನು ಅಲ್ಲಾಹನು ಸ್ವೀಕರಿಸಲಿ ಎಂದು ಆಶಿಸಲಾಯಿತು.
