ಮೂಡುಬಿದಿರೆ: ದಿವಂಗತ ಕೆ. ಅಮರನಾಥ ಶೆಟ್ಟಿ ಅವರ ಮಾನವೀಯ ಸೇವಾ ಧ್ಯೇಯವನ್ನು ಮುಂದುವರೆಸಿಕೊಂಡು ಹೋಗುತ್ತಿರುವ ಕೆ. ಅಮರನಾಥ ಶೆಟ್ಟಿ ಚಾರಿಟೇಬಲ್ ಟ್ರಸ್ಟ್ ವತಿಯಿಂದ ಪುರುಷರು ಮತ್ತು ಮಹಿಳೆಯರಿಗಾಗಿ ಉಚಿತ ಕ್ಯಾನ್ಸರ್ ತಪಾಸಣಾ ಶಿಬಿರವನ್ನು ಆಯೋಜಿಸಲಾಗಿದೆ ಎಂದು ಟ್ರಸ್ಟಿ ಅಮರಶ್ರೀ ಶೆಟ್ಟಿ ತಿಳಿಸಿದ್ದಾರೆ.ನವೆಂಬರ್ 7ರಂದು ಮೂಡುಬಿದಿರೆ ಗಾಂಧಿನಗರದಲ್ಲಿರುವ ಶ್ರೀ ಧನಲಕ್ಷ್ಮಿ ಕ್ಯಾಶ್ಯೂ ಇಂಡಸ್ಟ್ರೀಸ್ ವಠಾರದಲ್ಲಿ ನಡೆಯಲಿದೆ. ಬೆಳಗ್ಗೆ 9:00 ಗಂಟೆಯಿಂದ ಮಧ್ಯಾಹ್ನ 1:00 ಗಂಟೆಯವರೆಗೆ ಶಿಬಿರದ ಸೇವೆಗಳು ಲಭ್ಯವಿದೆ.
ಕ್ಯಾನ್ಸರ್ನಂತಹ ಮಹಾರೋಗದ ಕುರಿತು ಮುಂಜಾಗ್ರತಾ ಮಾಹಿತಿ ಮತ್ತು ಪರಿಹಾರ ಒದಗಿಸುವ ನಿಟ್ಟಿನಲ್ಲಿ ಈ ಶಿಬಿರವನ್ನು ಇಂಡಿಯನ್ ಕ್ಯಾನ್ಸರ್ ಸೊಸೈಟಿ ಹಾಗೂ ಎ.ಜೆ. ಆಸ್ಪತ್ರೆ ಮತ್ತು ಸಂಶೋಧನಾ ಕೇಂದ್ರದ ಸಹಯೋಗದೊಂದಿಗೆ ಆಯೋಜಿಸಲಾಗಿದೆ. ರೋಟರಿ ಕ್ಲಬ್ ಆಫ್ ಮೂಡುಬಿದಿರೆ ಟೆಂಪಲ್ಟೌನ್ , ಸಾರ್ವಜನಿಕ ಶ್ರೀ ಸತ್ಯನಾರಾಯಣ ಪೂಜಾ ಸಮಿತಿ, ಗಾಂಧಿನಗರ ಹಾಗೂ ಮಡಿವಾಳ ಸಮಾಜ ಸೇವಾ ಸಂಘದ ಸಹಯೋಗದಲ್ಲಿ ಶಿಬಿರ ನಡೆಯಲಿದೆ.
ಟ್ರಸ್ಟ್ನ ಧ್ಯೇಯೋದ್ದೇಶಗಳಿಗೆ ಅನುಗುಣವಾಗಿ ಗ್ರಾಮೀಣ ಮಹಿಳಾ ಸಬಲೀಕರಣ ಮತ್ತು ಆರೋಗ್ಯಕ್ಕೆ ಆದ್ಯತೆ ನೀಡಿ, ನುರಿತ ತಜ್ಞ ವೈದ್ಯರಿಂದ ಈ ಶಿಬಿರವನ್ನು ಆಯೋಜಿಸಲಾಗಿದ್ದು, ಸ್ಥಳೀಯರಿಗೆ ಇದು ಉತ್ತಮ ಅವಕಾಶವಾಗಿದೆ. ಶಿಬಿರದಲ್ಲಿ ಲಭ್ಯವಿರುವ ಸೇವೆಗಳುಈ ಶಿಬಿರದಲ್ಲಿ ಪುರುಷರು ಮತ್ತು ಮಹಿಳೆಯರಿಗೆ ಪ್ರತ್ಯೇಕವಾಗಿ ಕ್ಯಾನ್ಸರ್ ತಪಾಸಣೆಗಳು ಹಾಗೂ ಸ್ತ್ರೀಯರ ವಿಶೇಷ ಆರೋಗ್ಯ ತಪಾಸಣೆಗಳನ್ನು ಮಾಡಲಾಗುತ್ತದೆ. ಕ್ಯಾನ್ಸರ್ ಕುರಿತು ಅರಿವು ಮೂಡಿಸಲು ವೀಡಿಯೋ ಪ್ರದರ್ಶನದ ಮೂಲಕ ಮಾಹಿತಿಯನ್ನು ಒದಗಿಸಲಾಗುತ್ತದೆ.ಯಾವ ಲಕ್ಷಣಗಳಿರುವವರು ಕಡ್ಡಾಯವಾಗಿ ಭಾಗವಹಿಸಬೇಕು?
ನೀವು ಈ ಕೆಳಗಿನ ಯಾವುದೇ ಲಕ್ಷಣಗಳನ್ನು ಅನುಭವಿಸುತ್ತಿದ್ದರೆ, ತಪಾಸಣೆ ಮಾಡಿಸಿಕೊಳ್ಳುವುದು ಸೂಕ್ತ:
* ಎದೆಯಲ್ಲಿ ಅಥವಾ ತೋಳಿನ ಕೆಳಗೆ ಮಾಂಸದ ಬೆಳವಣಿಗೆಯಂತೆ ಗಡ್ಡೆ ಅಥವಾ ಊತ.
* ದೀರ್ಘಕಾಲದ ರಕ್ತಸ್ರಾವ ಅಥವಾ ಮೊಲೆತೊಟ್ಟುಗಳಿಂದ ಅಸಹಜ ಸ್ರಾವ.
* ಸಾಂದರ್ಭಿಕ ಕೆಮ್ಮು, ದನಿ ಒರಟಾಗುವುದು ಅಥವಾ ನುಂಗಲು ತೊಂದರೆ.
* ನಾಲಿಗೆ ಅಥವಾ ಗಂಟಲಿನಲ್ಲಿ ವಾಸಿಯಾಗದ ಹುಣ್ಣುಗಳು ಅಥವಾ ಗಾಯಗಳು.
* ಅಜೀರ್ಣ, ಹಸಿವು ಕಡಿಮೆಯಾಗುವುದು, ಹೊಟ್ಟೆ ಉಬ್ಬುವುದು ಮತ್ತು ಗಮನಾರ್ಹ ತೂಕ ನಷ್ಟ.
* ರಕ್ತಹೀನತೆ, ಪದೇ ಪದೇ ಸೋಂಕುಗಳು ಅಥವಾ ಮೂಳೆ ನೋವು.
ಹೆಚ್ಚಿನ ಮಾಹಿತಿಗಾಗಿ: 9845240064, 9845353251 ಸಂಪರ್ಕಿಸಬಹುದಾಗಿದೆ.
